بْـ وَطَني أَنا مُواطِنْ بَدّي حْقوقي المَشْروعَهْ جورج بيطار

بْـ وَطَني أَنا مُواطِنْ
بَدّي حْقوقي المَشْروعَهْ
وْ لَمَّنْ إِحْكيهْ لَلمَسْؤولْ
تْكونْ الكِلْمِهْ مَسْموعَهْ
بَدّي إِسْتِشْفى وْ تَعْليمْ
مَعْ ضَمانْ الشَّيْخوخَهْ
وْ بَدّي لِلشَّعْبْ قْوانينْ
مْحِقَّهْ وْ مَنّا مَمْسوخَهْ
بَدّي مْوَظَّفْ دَوْلِتْنا
يِخْدُمْ هالشَّعْبْ المِسْكينْ
وْ مِشْ بِـ الرَّشْوِهْ يِتْحِفْنا
تا يْمَللي جْيابو مْلايينْ
بَدّي نايِبْ بِـ المَجْلِسْ
هَمّو يْشَرِّعْ وِ يْحاسِبْ
مِشْ يِفْتَحْ مَكْتَبْ تَوْظيفْ
لْـ أَزْلامو وْ لِلقَرايِبْ
بَدّي حْكومِهْ تِحْكِمْنا
بِـ الشِّرْعَهْ الإِنْسانِيِّهْ
مِشْ عِصابِهْ تِنْهَبْنا
بْـ إِسْمْ الوِحْدِهْ الوَطَنِيِّهْ
بَدّي قاضي يْكونْ إِنْسانْ
بْـ حِكْمو يْحَكِّمْ ضَميرو
وْما يْكونْ زَلَمِهْ لَـ فْلَيْتانْ
زَيْ ما بَدّو بِـ ديرو
وْ بَدّي مِنْ بَنْكْ الإسْكانْ
يْوَفِّرْ قَرْضْ لْـ هالشَّبابْ
تا يْضَللو بْـ أَرْضْ لِبْنانْ
وْ ما يْسَكِّرْ بِـ وِجُّنْ بابْ
وْ ما بَدّي رَأْسْ السُّلْطَهْ
يَعْمِلْ حالو مِشْ شايِفْ
وْ يَغَطّي زِلْمْ الفَسادْ
لأَنّو مِنُّنْ خايِفْ
****
هَيْدا مَطْلَبْ كِلّْ النّاسْ
إِسْلامْ وْ مَسيحِيِّي
بَدُّنْ دَوْلِةْ عَدالِهْ
عَ الأُسُسْ الوَطَنِيِّهْ
يَللا فيقو يا حِكّامْ
وْ بَلا هالعَنْجَهِيِّهْ
وْ نِرْجَعْ سَوا إيدْ بْـ إيدْ
نِبْني دَوْلِهْ قَوِيِّهْ
وَ إِلاّ سْمَعوني مْنيحْ
وِ انْتِبْهولي شي شْوَيِّي
ثَوْرِةْ لِبْنانْ العَظيمْ
رَحْ تِسْحَقْكونْ راسْ وْ راسْ
بِـ القَبْضَهْ الحَديدِيِّهْ
————