حاجي عليّي تِتْجَنّي يا بِنْت النّاسْ جورج بيطار- المدرسة الأهليَّة

حاجي عليّي تِتْجَنّي يا بِنْت النّاسْ
خَلّلي بْقَلْبِكْ حِنِّيّي وْرِقَّهْ وْإِحْساسْ
ما تْقولي فِكْري عْلَيْكي مَنّو مَشْغولْ
حُبِّكْ عِنْدي حارِقْلي دينْ الأَنْفاسْ
******************
نْهارْ الْما بْشوفِكْ بِبْقى مْلَبَّكْ حِزْنانْ
وْبِشْعُرْ إنّي مْنِ عْيونِكْ قَلْبي وَلْهانْ
ما تْلوميني نْ شِفْتيني مْضَوّي الشَّمْعاتْ
وْقاعِدْ عا مَذْبَحْ حُبِّكْ عامِلْ قِدّاسْ
*****************
الدِّنْيي قالو مْحَلّيها نَجْماتْ اللَّيْلْ
وِالبَدْرِ اللي مْضَوّيها مِنْ مَيْلْ لْمَيْلْ
بَسْ القُصَّهْ وْما فيها الهَيْئَهْ نِسْيو
إنّو وِجِّكْ يا حِلْوِهْ هُوّي النِّبْراسْ
****************
وِحْياتِكْ فيكي تْغَنّو كِلّ الشُّعّارْ
وْجَمالِكْ حِكْيو عَنّو بْكِلّ الأَخْبارْ
وْتا إِقْدَرْ إمْنَعْ عَنِّكْ صَيْباتْ العَيْنْ
خِبَّيْتِكْ جُوّا عْيوني مْنِ عْيونِ النّاسْ
****************
بْغارْ عْلَيْكي مْنِ الرّيحْ وْمِنْ نَسْماتو
بْغارْ عْلَيْكي مْنِ الطَّيْرْ وْغِنِّيّاتو
حَتّى جْبَرْتيني بْبابِكْ أُوقَفْ ناطورْ
حامِلْ سِكّيني بإيدي وْعامِلْ مِتْراسْ
****************
العيشي مِنْ بَعْدِكْ مُرَّهْ يا نورْ العَيْنْ
ما تْلوميني شي مَرَّهْ انْشيفْتيني اتْنَيْنْ
فاتْ الأَوَّلْ عَ عْيونِكْ.. سَكَّرْ الِبْوابْ
وْفاتْ التّاني عَ قَلْبِكْ مِتْلِ النِّسْناسْ
****************
جورج بيطار- المدرسة الأهليَّة

اضف رد

لن يتم نشر البريد الإلكتروني .